ធ្វើអត្តឃាតដោយសារមានជំងឺផ្លូវចិត្ត និងតូចចិត្តឪពុកម្តាយជំពាក់បំណុលគេ
18-July-2016 | ដោយ មែន កំសត់
ខេត្តប៉ៃលិន ៖ ដោយសារតែមិនឃើញកូនស្រីងើបដូចសព្វមួយដង ឪពុកក៏បានប្រើម្តាយឲ្យទៅដាស់កូន ពេលម្តាយទៅដល់មុខបន្ទប់កូនស្រីស្រាប់ម្តាយស្រែកទ្រហោយំបង្កឲ្យ មានការភ្ញាក់ផ្អើលយ៉ាងខ្លាំង ព្រោះកូនស្រីបានចង.កសម្លាប់ខ្លួនបាត់ទៅហើយ ។
ហេតុការណ៍ចងកធ្វើអត្តឃាតខ្លួនឯងនេះបង្កឱ្យមានការភ្ញាក់ផ្អើល កាលពីវេលាម៉ោង៧ និង១០នាទីព្រឹក ថ្ងៃទី១៨ ខែកក្កដា ឆ្នាំ២០១៦ នៅចំណុចក្នុងបន្ទប់លើផ្ទះរបស់ខ្លួនខាងក្រោយភ្នំយ៉ាត ស្ថិតក្នុងភូមិវត្ត សង្កាត់ប៉ៃលិន ក្រុងប៉ៃលិន ។
សមត្ថកិច្ចបានឲ្យដឹងថា យុវតីរងគ្រោះឈ្មោះ ម៉ៅ វិជួន ភេទស្រី អាយុ១៧ឆ្នាំ ជាកសិករ ឈប់រៀនត្រឹមថ្នាក់ទី៩ រស់នៅភូមិកើតហេតុខាងលើ មានបងប្អូនប្រុសស្រីចំនួន៩នាក់ ប្រុស៣នាក់ស្រី៦នាក់ យុវតីរងគ្រោះជាកូនទី៦ ។
ប្រភពព័ត៌មានបានឱ្យដឹងថា ជារៀងរាល់ថ្ងៃមុនពេលកើតហេតុយុវតីរងគ្រោះតែងតែទៅស៊ីឈ្នួលដាំពោត និងដំឡូងមីឱ្យគេ ជាមួយបងប្អូន និងឪពុកម្តាយរបស់ខ្លួន ហើយក៏តែងតែពោលប្រាប់អ៊ុំពូមីងរបស់ខ្លួនថា រូបគេមានការពិបាកចិត្តយ៉ាងខ្លាំង ដោយសាររៀនសូត្រមិនបានជ្រៅជ្រះនឹងគេ ។ ម្យ៉ាងវិញទៀត ងាកបែរមកមើលក្រុមគ្រួសារមានបងប្អូនច្រើនរហូតដល់៩នាក់ ដោយឪពុកម្តាយធ្វើចម្ការដាំដំឡូងមីពីមួយឆ្នាំទៅមួយឆ្នាំ បន្ទាប់ពីប្រមូលផលរួចលក់ឱ្យឈ្មួញមានតម្លៃថោក ហើយខាតលុយកាក់ ជំពាក់បំណុលគេជាច្រើន ។
ប្រភពបន្តទៀតថា នៅរសៀលថ្ងៃកើតហេតុ ខណៈរូបគេដាំពោតបណើ្តរនិយាយលេងសើចជាមួយបងប្អូនឪពុកម្តាយបណ្តើរ ហើយពោលប្រាប់ថា មើលទៅក្រុមគ្រួសាររបស់គេគ្មានថ្ងៃណានឹងរកលុយបានសងជំពាក់បំណុល អង្គការ និងធនាគាររួចនោះឡើយ រូបគេពិតជាពិបាកក្នុងចិត្តខ្លាំងណាស់ ។ ប្រភពបន្តទៀតថា ពេលត្រឡប់មកដល់ផ្ទះវិញ គេសង្កេតឃើញនាងមានទឹកមុខស្រងូតស្រងាត់ដោយពោលថា ថប់ក្នុងដើមទ្រូង ហើយពេលនោះនាងនិយាយថា ឃ្លានហូបសាច់គោអាំង ស្រាប់តែឪពុកម្តាយបានឱ្យលុយយកទៅទិញនាំបងប្អូនហូបទាំងអស់គ្នា រួចក៏នាំគ្នាងូតទឹកចូលទៅដេកនៅលើផ្ទះរៀងៗខ្លួន ដោយឪពុកម្តាយចងមុខដេកនៅខាងក្រោមផ្ទះ រហូតដល់ព្រឹកថ្ងៃកើតហេតុ ដោយសារឃើញកូនស្រីម្នាក់នេះដេកយូរពេក ឪពុកក៏ប្រើឱ្យម្តាយទៅដាស់កូន ដើម្បីទៅស៊ីឈ្នួលដាំពោតឱ្យគេបន្តដូចសព្វមួយដង លុះចូលទៅដល់មុខបន្ទប់ ក៏ឃើញកូនស្រីចងកធ្វើអត្តឃាតស្លាប់បាត់ទៅហើយ រួចក៏នាំគ្នាស្រែកយំបង្កការភ្ញាក់ផ្អើល រួចរាយការណ៍ឱ្យអាជ្ញាធរនិងសមត្ថកិច្ចចុះទៅពិនិត្យតែម្តង ។
បន្ទាប់ពីធ្វើការពិនិត្យសាកសពរួចមក សមត្ថកិច្ចជំនាញបានបញ្ជាក់ឱ្យដឹងថា យុវតីរងគ្រោះបានធ្វើអត្តឃាតដោយសារមានជំងឺផ្លូវចិត្ត និងតូចចិត្តឪពុកម្តាយជំពាក់បំណុលគេពិតប្រាកដមែន មិនមានករណីឃាតកម្ម ឬអំពើណាមួយកើតឡើងនោះឡើយ ។ ទោះបីជាយ៉ាងណាក៏ដោយ បច្ចុប្បន្នសមត្ថកិច្ចជំនាញបានធ្វើកំណត់ហេតុ និងប្រគល់សាកសពជូនអាណាព្យាបាលដើម្បីធ្វើបុណ្យតាមប្រពៃណី ។
សូមបញ្ជាក់ថា ក្រុមគ្រួសារយុវតីរងគ្រោះក្រីក្រណាស់ រហូតមកដល់រសៀលថ្ងៃដដែលនេះគេមិនទាន់ឃើញឪពុកម្តាយធ្វើមឈូស លើកសពដាក់ដើម្បីរៀបចំយកទៅបញ្ចុះ ឬក៏បូជានៅឡើយទេ ៕
ចំនួនអ្នកទស្សនា
- ថ្ងៃនេះ1171
- ម្សិលមិញ6261
- សប្តាហ៍នេះ19551
- ខែនេះ134701
- ឆ្នាំនេះ134701
- សរុប20577157